آج ہم اُردو میں شہری زندگی پر مضمون فراہم کرنے جا رہے ہیں۔ یہ مضمون ان طلباء کی مدد کر سکتا ہے جو شہر کی زندگی کے بارے میں معلومات تلاش کر رہے ہیں۔ یہ مضمون یاد رکھنے میں بھی آسان ہے۔ اس مضمون کو آسان اور سادہ الفاظ میں لکھا گیا ہے لہذا کوئی بھی طالب علم اس موضوع پر لکھ سکتا ہے۔
شہری زندگی پر مضمون
شہر کی زندگی بہت جدید اور پرلطف ہوتی ہے۔ شہر کے لوگ آسائشوں اور آرام دہ سہولیات سے لطف اندوز ہوتے ہیں۔ شہر کی زندگی میں بہت سی سہولیات دستیاب ہوتی ہیں۔
شہر کی پہلی پرکشش چیز اس کی روشنی اور خوبصورتی ہے۔ دنیا کی ایسی کوئی چیز نہیں ہے جو انسان کو شہر میں نہ مل سکے۔ یوں تو شہر میں اشیاء مہنگی ہوتی ہے لیکن پھر بھی لوگ گاؤں کے بجائے شہر میں رہنا پسند کرتے ہیں۔
شہر کی زندگی کے فوائد
شہری زندگی میں چند خوبیاں اور خامیاں ہیں۔ شہر کی زندگی کے چند فوائد درج ذیل ہیں۔
1) تعلیم کے مواقع
شہر میں طلباء کے لیے بہت سے تعلیمی مواقع موجود ہوتے ہیں۔ شہر میں ایسے تعلیمی ادارے ہیں جو پرائمری سے پوسٹ گریجویشن تک تعلیم فراہم کرتے ہیں۔ تعلیمی اداروں میں لڑکے اور لڑکیوں دونوں کے لیے پڑھنے کے انتظامات ہوتے ہیں۔ یہ ادارے ہر طالب علم کو مختلف تعلیمی سرگرمیوں میں حصہ لینے کا موقع فراہم کرتے ہیں۔
ان صحت مندانہ سرگرمیوں کے نتیجے میں شہروں میں رہنے والے بچے زیادہ پر اعتماد اور ذہین ہوتے ہیں۔ اس کے علاوہ، شہر میں موجود عجائب گھر اور کتب خانے بھی تعلیم کا ایک بڑا ذریعہ ہیں۔
2) طبی مواقع
شہروں میں طبی سہولیات بہترین ہوتی ہیں۔ شہر کے ہسپتالوں میں کسی بھی قسم کی ایمرجنسی سے نمٹنے کے لیے جدید مشینیں اور آلات موجود ہوتے ہیں۔ شہروں میں بیمار لوگوں کے علاج کے لیے بہت سے قابل ڈاکٹر خدمات سرانجام دیتے ہیں۔
3) ملازمت کے مواقع
شہروں میں افراد کے لیے کافی ملازمتیں دستیاب ہوتی ہیں۔ روزگار کے یہ مواقع روزانہ کی بنیاد پر کام کرنے والوں سے لے کر پیشہ ور افراد تک سب کے لیے ہوتے ہیں۔
ایک شخص آسانی سے کوئی ایسی نوکری ڈھونڈ سکتا ہے جو اس کی قابلیت کے مطابق ہو یا وہ اپنا کاروبار بھی شروع کر سکتا ہے۔
4) تفریحی مواقع
شہروں میں بڑے تجارتی مراکز ہوتے ہیں جہاں لوگ ہر چیز خرید سکتے ہیں۔ اس کے علاوہ ، بہت سارے فلم گھر (Cinema) اور ریستوراں (Restaurant) بھی تفریح کا ایک بہترین ذریعہ ہیں۔ بچوں کے لیے بہت سی تفریح گاہ (Park) اور باغات بھی ہیں جہاں وہ کھیل سکتے ہیں اور لطف اندوز ہو سکتے ہیں۔
5) صفائی کے مواقع
شہر میں صفائی ستھرائی کا نظام بہترین ہوتا ہے۔ حکومت اس بات کو یقینی بنانے کے لیے خصوصی اقدامات کرتی ہے کہ شہر کو کوڑے اور آلودگی سے پاک رکھا جائے۔
شہر کی زندگی کے نقصانات
بہت سے فوائد کے علاوہ، شہر کی زندگی کے اپنے منفی پہلو بھی ہیں۔
1) سماجی دوری
ہر کوئی شہر کی زندگی میں اتنا مصروف ہے کہ ایک دوسرے کے لیے وقت نہیں نکال پاتا۔ شہری بہت دباؤ والی زندگی گزارتے ہیں جس سے ان کے سماجی پہلو پر کافی منفی اثر پڑتا ہے۔ مصروفیت کی وجہ سے شہر میں کسی کو اپنے پڑوسیوں تک کی بھی خبر نہیں ہوتی۔
شہر کے لوگ کامیابی اور اقتدار کی دوڑ میں اس قدر مصروف ہوتے ہیں کہ ان کے پاس اپنے گھر والوں کے لیے بھی وقت نہیں ہوتا۔ اس سے خاندانی تعلقات کے درمیان خلیج (Gap) پیدا ہو رہی ہے۔ شہر کے لوگ آخر کار کامیاب ہو تو جاتے ہیں لیکن بدقسمتی سے ان کے پاس اس وقت اپنی کامیابی اور خوشی بانٹنے والا کوئی نہیں ہوتا۔
2) آلودگی
شہر میں بہت زیادہ آلودگی ہوتی ہے۔ شہروں میں موجود مختلف کارخانوں کا دھواں براہ راست فضا میں جاتا ہے اور ماحول کو آلودہ کرتا ہے۔ اس کے علاوہ، شہروں میں طرح طرح کی گاڑیاں چلتی ہیں اور ان گاڑیوں سے دھواں نکلتا ہے، جو ہوا کو آلودہ کرتا ہے۔
3) ٹریفک جام کے مسائل
شہروں میں ٹریفک کا مسئلہ ایک اور بڑا مسئلہ ہے۔ چونکہ ہر کوئی دیہات سے شہر میں منتقل ہو رہا ہے اس لیے شہروں میں آبادی معمول سے زیادہ ہوتی جارہی ہے۔
اس بے قابو آبادی نے بہت سے مسائل کو جنم دیا ہے۔ چونکہ ہر کوئی اپنی ذاتی گاڑی پر ہی سفر کرنا پسند کرتا اس لیے ٹریفک جام اب روزمرہ کی زندگی کا حصہ بن چکا ہے۔ جس کی وجہ سے لوگ کے معمولات زندگی پر بھی اثر پڑتا ہے۔
نتیجہ (Conclusion)
شہری ایک بہتر معیار زندگی اور طرز زندگی فراہم کرتا ہے۔ شہر کی زندگی ایک فرد کے نقطہ نظر کو وسیع کرتی ہے اور مختلف شعبوں میں اسے اپنا ہنر دکھانے کا موقع فراہم کرتی ہے۔ یوں تو شہر کی زندگی کے کچھ نقصانات بھی ہیں لیکن نقصانات کے باوجود، شہر کی زندگی اب بھی اپنی دلکشی اور خوبصورتی رکھتی ہے۔
شہری زندگی پر دس جملے
1) شہری زندگی بہت ہنگامہ خیز ہوتی ہے۔
2) شہروں میں بہت سی سہولیات ہوتی ہیں۔
3) ان سہولیات کی وجہ سے شہر میں رہنے والوں کی زندگی کافی آسان ہوتی ہے۔
4) ان سہولیات سے فائدہ اٹھانے کے لیے لوگ شہروں میں رہنا پسند کرتے ہیں۔
5) شہرکی آب و ہوا گاڑیوں اور کارخانوں کی وجہ سے کافی آلودہ ہوتی ہے۔
6) شہر میں آلودگی کی وجہ سے بیمار ہونے کا زیادہ خدشہ ہوتا ہے۔
7) شہروں میں رہنے والے لوگ بہت مصروف ہوتے ہیں اور ان کے پاس کسی کے لیے وقت نہیں ہوتا۔
8) شہروں میں لوگوں کے پیشے (Professions) مختلف ہوتے ہیں۔
9) گاؤں سے بڑی تعداد میں لوگ شہروں میں روزگار کے حصول کے لیے آتے ہیں۔
10) شہروں اور دیہات دونوں میں زندگی اپنی اپنی جگہ اچھی ہے۔
مزید پڑھیے: